کوئی سچی کوشش بےثمر نہیں رہتی

عنوان: کوئی سچی کوشش بےثمر نہیں رہتی

زندگی نے مجھے ایک بہت حوصلہ دینے والی بات سکھائی: ہر محنت کا پھل ہمارے اپنے ہاتھ میں آنا ضروری نہیں، لیکن اخلاص سے کی گئی کوئی کوشش کبھی ضائع نہیں ہوتی۔ میں نے زندگی میں بہت سے بیج بوئے' کچھ بچوں کی تعلیم میں، کچھ رشتوں کو سنبھالنے میں، کچھ لوگوں کو ان کی صلاحیت کا یقین دلانے میں، اور کچھ ایسے کاموں میں جن کے نتائج اس وقت میری نظر سے بہت دور تھے۔ کچھ پودے میرے سامنے بڑے ہوئے اور ان کا پھل بھی مجھے ملا۔ کچھ ایسے تھے جنہیں میں نے وقت، توجہ اور محبت سے سینچا، مگر ان کی چھاؤں اور پھل کسی دوسرے کے نصیب میں لکھے گئے۔ وقت کے ساتھ میں نے سمجھا کہ یہی تو زندگی کی خوبصورتی ہے۔ کبھی ایک شخص بیج بوتا ہے، دوسرا اس کی حفاظت کرتا ہے، کوئی تیسرا اس کی چھاؤں میں بیٹھتا ہے اور پھل کسی ایسے شخص تک پہنچ جاتا ہے جسے بیج بونے والا شاید کبھی جانتا بھی نہ ہو۔ اس سے کسی کی کوشش کم نہیں ہوجاتی۔ ہوسکتا ہے ہمارا حصہ پھل حاصل کرنا نہ ہو' ہمارا حصہ صرف زمین تیار کرنا، بیج بونا یا کسی نئی زندگی کے امکان کو جنم دینا ہو۔ اپنے نصیب کو خوشی سے قبول کرنا ہار ماننا نہیں۔ یہ اس یقین کے ساتھ آگے بڑھنا ہے کہ اللہ ہماری کوششوں کے سفر، ان کے اثر اور ان کے اصل اجر کو ہم سے کہیں بہتر جانتا ہے۔ اس لیے بیج بوتے رہیں۔ اپنے حصے کا کام محبت سے کرتے رہیں۔ پھل جہاں بھی لگے، اس کی خوشی منائیں, کیونکہ کسی کی زندگی میں پیدا ہونے والی آسانی آپ کی کوشش کا خوبصورت تسلسل بھی ہوسکتی ہے۔ — Hanifa’s Diary